الجمعة، 17 أبريل، 2009

انا بكرهك

كلمات الشاعرة الواعدة نضال الحاج

 

انا بكرهك بس بكرهك دنا بكره اليوم الصنع قلباً

يكورك ويندهك

انا بكره الوطن البلم شرف الغرام المنتهك

من ياتوا باب طليت على ما كنت اصلا بشبهك

               انا بكرهك

انا شيلته ريدك فى القليب وسقيته من دم العروق

صنقعته دليت النجم دنقرته كبيت نور وشوق

وعصرته موية الانتظار ختيته فى وجع الحروق

كان النتيجة تبيع هواى واريتو كان سويتلوا سوق

               انا بكرهك

من وين اجيب ليك الدموع من وين اصنقر حيل

كلام امنيات قلبه الرجوع من وين اذا هتك الظلام

حيل خيلى القالك شموع لكنى مجبور اطردك و

واقفل وراك باب الطلوع

                انا بكرهك

شديت رحالاتى ومشيت وقتين هتك حيلك هواى

ارتحته فى موجى ورسيت لا حرك الموج البحر

لا صد قلبىولا قسيت لكن طلعته خيال عشم

ضمخ رؤى الوجع المميت

              انا بكرهك

قدر اشتهاى انا بكرهك قدر الغرام الكان زمان

كابت مسامتى وهواى انا بكرهك

قدر انى ما لوثته بيك كريات شراينى ودماى

انا بكرهك

قدر انى غنيتك غناى  

من وين دخلته على مدن شاخت من الوجع الاليم

من وين طرقته جدار قلب لقح هوى العشق العقيم

من وين سخت شمسك على كانت سماى مليانه غيم

فتق جراحاتى وامش خلينى فى لهب الجحيم انا قلت

ليك انا بكرهك

قدر المواسم الشاده خيل الريد عليك 

انا بكرهك

قدر المصايب الحارسة بوابات مجيك

انا بكرهك

نفس المسافة وحجم قلبى الكان تملى بيشتهيك

بقى بكرهك

اتوكل ارحل منى فوت حرمان على قلمى

الكلام كان غيرك اجتاحو السكوت

خليهو قلبى الاندفن تنسج عليه العنكبوت او

خلى من بعدك اموت

الموت اخير من انى افضل فى رحابك وفى رجاك

انا كنت لو غاب القمر دايما بضوى ظلام دناك

وانا كنت لو غيمك رحل بطلع عشان اسكن سماك

وانا كنت لو بردك نزل بوقد صوابعى لهيب حداك

لكن منو القدر كده

والله لو انا فى محلك بنسج الشمس احترام واهديها

ليك متمدده

بفتح كراريس الكلام واختار حروفى واجرده

وانبش قبور المستحيل كلمات شكر متفرده

لكن خسارة على قلب حباك بلا مايعرفك انعل ابو

القلم العلى دفتر غناك دمه انسفك

انعل ابو الشعر الغشانى وغنى فيك وألفك

ملعون غناى ما امتطيت خيلى وبقيت اتأسفك

بتأسفك وقتين عيونى يسوقن الشوق لانتظارك

لما ليلى يسوق محاسنه وينهزم عندك نهارك

لما ما ابكى انهزامى عشان ابارك انتصارك

لما كوكبى ساب مداروا ورحل عشان يسكن مدارك

لكن وحاتك بكرهك

ندمانة على عمراً معاك ضيعتوا فى غفلة زمن

ندمانة على دمعاً سكبتوه على رضاك بلا تمن

انا كنت بحلم فى وجودك ينكسر خاطر الشجن

لكن رضاى عليك عشم ابليس قصاد  جنة عدن

                 انا بكرهك

كل ما يطول ليلى ويواتيهو العذاب

                انا بكرهك

كل ما القلم يركب مصاعب الدنيا يمشى على الكتاب

                 انا بكرهك

كل ما  الفراق كتل مضامين العشق سدالو باب

                انا بكرهك

قدر العيون ما تلبس التوب الزراق تتوضى موية الانتحاب

 انا بكرهك من كل باب انا بكرهك واتوكل ارحل من جواى

غلطان اذا قلبك هداك قال ليك حاتفضل غناى

غلطان اذا عقلك رضخ لى ظن يقول ليك انك هواى

والله مافارق معاى انا كنت ناوى اجملك بس كنت ناوى اجملك

وامسك مضامين اللغات من فيض حروفى اكملك

ترحل على درب العشم بى زاد هواى أحملك

وقتين يخش قلبك جراح اقطع قليبى وادملك

ندمان منو ؟

أنا غايتو ما ندمان عليك أتوكل أرحل من جواى

عيش العذاب الباقى فيك

ولو قلبك اتجرأ رجع

حقك تلومو على مجيك

عشان انت قليبى مليتو دم

ياخ قلبى انت مليتو دم

ماعاد لو باقى يسيبوا  ليك

على كل حال انا بكرهك

عدد الحصى وعدد الرمال

انا بكرهك

عدد الصواب والاحتمال

أنا بكرهك

عدد الحقايق والخيال

أنا بكرهك

عدد الشنا وعدد الجمال

أنا بكرهك

عدد الشعر ما سن سيف الارتجال

أنا بكرهك

عدد الاجابات والسؤال

أنا بكرهك

عدد الممكن والمحال

أنا بكرهك

عدد ما زمان قت ليك تعال

انا بكرهك

مستورة حالى وراك

وفوت يا دابو ليلك همو طال

على كل حال

أنا بكرهك

‏هناك 11 تعليقًا:

  1. أنا بكرهك . ياخي كرهتينا أنا بكرهك أنا بكرهك
    مع انها قصيدة ابداع في شكل بكرهك .
    تسلمي يا بكرهك ( والله قصيدة تخوف ) .. ( رفيق )

    ردحذف
  2. ليه تكرهي ؟
    ليه تكرهي القلب البنادي علي غريبا ماهو في ؟
    ليه تكرهي الوطن الجمع اشلاء غراما منتهي ؟
    ليه تكرهي القلب النبض بي حبو قلبك من سنين ؟
    ليه تفتحي الباب للدموع
    ليه تزرعي الشوق في ارض كانت تضم الياسمين
    شبهك قليل يا شامخة زي قمم الجبال
    يا حلوة زي زهر الربيع ياساطعة زي شمس الضحي
    يالوحة ضاجة حياه وشعور يا حقيقة اروع من خيال
    يا سامقة زي قمم الجبال
    ليه تكرهي ؟
    رد للقصيدة أنا بكرهك للاخت راحيل عثمان السيد ابراهيم.
    طبعا قصيدة طويلة جدا اخترت منها هذه الابيات
    تسلمي ايمان ............... ( رفيق )

    ردحذف
  3. أمس اتصلت بالأمل !
    قلت له: هل ممكن؟
    أن يخرج العطر لنا من الفسيخ والبصل؟
    قال: أجل.
    قلت: وهل يمكن؟
    أن تشعَل النار بالبلل؟
    قال: أجل.
    قلت: وهل من حنظل يمكن تقطير العسل؟
    قال: نعم.
    قلت: وهل يمكن؟
    وضع الأرض في جيب زحل؟
    قال: نعم، بلى، أجل.. فكل شيء محتمل.

    قلت: إذن XXXX سيشعرون بالخجل؟
    قال: تعال ابصق على وجهي...
    إذا هذا حصل

    It's heartbreaking Ema
    OOSH

    ردحذف
  4. السلام ُ عليكم ورحمة الله وبركاتُه ..

    الأخت إيمان والأخ غير معروف ، لقد قرأت ُ تعليق الأخ غير معروف حول الصيب ، وهنا يشيد بالقصيده ويصفها أنها إبداع ، وبدت ليه وخوخته ظاهره وأنه لم يقول كلامه من منطلق ديني بل من منطلق شخصي فهناك شيء ُ في نفسه ، لأن هذه القصيده هي التي ينبغي ان تنتقد لا سيما في مطلعها وهنا ...
    أود لفت نظر الأخت إيمان إلى مطلع القصيده عندما قالت الشاعرة هداها والله ..
    انا بكرهك بس بكرهك دنا بكره اليوم الصنع قلباً

    فمن هو الذي يصنع القلوب ؟ كل ُ منا يعرف أن الله هو صانع الخلق وهو المصور في الأرحام فماذا يعني أن تدرجي كره الله في هذه القصيده ...

    وهـُناك قاعدة شرعية أبـشرك ِ بها أخت إيمان وهي
    أن ناقل الفـِسـق ِ لا يـَفسـق ...

    ردحذف
  5. انا الذي كتبت التعليق أعلاه ولا اود التواصل مع المدونة في مقبل الأيام لذا اخترت غير معروف ليسهل لي التعليق .. وأود أن أضع لنفسي كنيه ألا وهي

    حـيدرا للتفريق بيني وبين صاحب الجدل البيزنطي غير معروف ..

    ردحذف
  6. اشكرك ايمان علي النقل وشكرا نضال علي الروعه والجمال وحقيقه قصيده غايه في الروعه والحلاوه

    واظنها حب جنوني وليس كراهيه شكرا شكرا

    ردحذف
  7. حقيقى قصيدة روعة -عجبتنى شديد -شكرا ياأخت إيمان

    ردحذف
  8. نفس الملامح والشبه قصة خيال متحققه و ومتكرره

    ردحذف
  9. قصييده راائعه بمعنى الكلمه

    ردحذف
  10. خطيييييييييييره

    ردحذف
  11. قصيده جميله جدا اخت ايمان

    ردحذف